سؤیوش دئنن جانیم!

بو گونلر هامی سؤیوش دئییر. خیابانا چیخدیقدا، اوتوبوسا میندیکده. ایش یئرینده همکارلاری دینلدیکده، لاب بئله آتام ائوده تلویزیوندان مقصدلی اخباری دینلدیکده قاشلارینی دویونله ییب درین نفس آلاراق، ایستر ایستمز اوره یینده سؤیوش دئییر. منده سؤیوش دئییرم! سنده سؤیوش دئییرسن! مدرسه قاباغیندا قودوران یئنی یئتمه محصیل لرده سؤیوش دئییر! دوننه دک بیشعور دئییب دانیشان اوتانجاق قیزلار دیوث دئییر! و بونونلا یاناشی ارکک لرده عمومی فضالاردا هئچ اوتانیب چکیلمه دن جینسل سؤیوشلری آغزیلارینا گتیریب دیک – دیک یول گئدیرلر!

اینترنت اوزره مجازی صحیفه لرده گئدن پوستلار سؤیوش ویترینی اولوب! چوخ چتین بیر پوستا راست گلیریک کی الوان الوان سؤیوشلردن عیبارت کامئنتلری اولماسین. سؤیوش سانکی کئفین نئجه دی سؤزونون یئرینی آلیب. دینیب دانیشمادان عصبی اولوروق. اؤزونده کیمسه دست ناماز سویا چکمه سین. ایران آدلی عصبی جغرافیادا فارسی دا سؤیوش دئییر تورکوده، تراکتور آدلی طرفدارلارلیق صحیفه لرینه گؤز دولاندیردیقدا بونا واقیف اولوروق.

سؤز قونوسو ادب دن ساوای، ایران خالقی سون درجه ده عصبی لشیب یا بیر دلی قانلی یولداش دئمیشکن اعصاب اولوب. اونا گؤره ده هر باهانا ایله اولموش اولسادا، صبیر داشیمیز دولوب داشاراق سؤیوش دئییریک. بونو آراشدیرماق لازیم. بیر توپلوم دا بونجا سؤیوشون گئتمه سی البته کی نرمال اولمادان چوخ قورخونج دور!

دلی اولوب باش گؤتوروب دوکتوره گئتسن ده دئییر: سؤیوش دئنن جانیم. سؤیوش دئنن قوی اوره یین بوشالسین. سنین کی ایشین یوخ ایدی. پولون یوخ ایدی. پوخ یئییردین ائولنیردین مملکتین جمعیتینی آرتیریب وطن اوچون سیاهی لشکر بئجره سن. سنین کی شاسی بلند ماشینین یوخ ایدی آنلامیردین قدی بلند بیر گؤزلی سئویردین!

سؤیوش دئنن جانیم. سؤیوش دئنن قوی بونو یازان بیریسی ده بلکه باشی الحد داشینا دییب یاری یولدان قاییتسین! بو یازینی اوخویان گؤزلیم، باجیم، قارداشیم، دوستوم، یولداشیم، سیرداشیم سؤیوش دئنن جانیم. سؤیوش دئنن قوی اوره یین بوشالسین! گؤزلرینی یوم آغزینی آچ سؤیوش دئنن قوی دونیا سنی بارماقلا گؤسترسین!

«آیین شایین»

منبع : ... آیین شایین ... ayinshayin ... |سؤیوش دئنن جانیم!
برچسب ها : سؤیوش ,دئنن ,دئییر ,جانیم ,ایدی ,عصبی ,سؤیوش دئنن ,دئنن جانیم ,سؤیوش دئییر ,جانیم سؤیوش ,دئنن جانیم سؤیوش