آذر آیی گلدیکده همیشه قریب حیسلر یاشاییرام. بیلمیرم، بلکه ده بو فصیل لر ایچره سئودییم پاییزین، ائله اؤزوندن آسیلی اولا. گونشلی هاوانین ترسینه بولوت دولو دومانلی هاوانین دلی سی یم. بیر تهر گؤزل احساس لار یاشییرام. قلمه آلیب یازیب وصف ائتمک بیرآز چتین اولور! بئله احساس ائلیرم پاییز دلی دولو، آجیلی – شیرینلی خاطیره لر فصلی دیر. حتی اونلاری گؤروب یاشاماساندا، ائشیدیب اوخودوقدا یاشایا بیلرسن. آذربایجانی شاختاسیز بورانسیز. قدیم پاییز آخشاملاریندا قه فه سیز تصور ائتمک چتین اولور نئجه کی صمدی ده  یون پاپاقی یوخسا اوورکت سوز دوشونمک اولمور.

سؤز قونوسو آذربایجانی پاییزسیز، پاییزی آذرسیز و آذر آیینی «آزاد وطن» سیز دوشونمک اولمور. «چینار آغاجی سینار لاکین اییلمز» دئین «محمدامین» باخساناٰ، سیرداغی اوزره چینار آغاجلارینی کسیب یئرینه شام آغاجی اکیرلر! نییه کی شامی بزه ییب ویترینلره قویورلار و هامی گولومسه یه رک بایرام گلیر موبارک لر دئییرلر!

تبریزین،

قارا گیله سی دیر اوره ییم

آذر آیی گلدیکده،

دولان با دولان

گزیری کوچه لرینی

یاندیریلمیش کیتابلارین کؤزوندن

سورمه چکیب گؤزلرینه،

سئوگیلیم!

آزاد وطن دوداغینی اؤپدوکده

گولومسه ییر، فدائی نین مزاری

«آیین شایین»

ایضاح:

«قارا گیله» اصیل تبریز ماهنی سی اولاراق، میللی حؤکومت آغیسی ایله دیللر ازبری اولموش.

محمد امین آزاد وطن، اورمو فدائی لرین باشچیسی ایمیش. شاه قوشونو اورمویا یئتیرمه دن اؤنجه شاهچیلار الیله آغیر ایشکنجه لر وئریب دار آغاجیندان آسیرلار.

 

منبع : ... آیین شایین ... ayinshayin ... |آذر آیی!
برچسب ها : دوشونمک اولمور ,چتین اولور